Vrijwilliger van de maand juli 2020; Wim Reijnhout

Vandaehe maeke me de vrijwillher van de maend Juli bekend. De mîîste van julder zullen an de Zeeuwse taele a wè kunnen behriepe wie at ut eworren is. Me ènt't naemelijk over Wim Reijnhout. A sins jaer en dag een drievende kracht achter de voebalverenihinge. De afgelôpe tiet ei Wim ondanks de Corona op't voebalveld hesti om de JO9 training te heven. De JO9 en veurheen de E'tjes is eihenlijk ah jaeren 't teampje wat a Wim training geeft. Dih is'n nie mee behonnen. Ie is behonne mee training heven van de B'tjes in '82/'83. Vanaf toen ei Wim eihenlijk oale teampjes wèh een keertje ehad, behalve de A'tjes. Voe zover we weet'n ei Wim die nooit èdìh. Wim dee nog wèh vee mèèr voe de verenihinge. Zo is'n jaerlijks betrokken ewist bie de orghanisatie van't P.Kik toernooi, ei't'n verschillende jubileums en eindseizoenfèèst'n georganiseerd. Voe Wim weare de jeugdvergaederingen vroeher oaltiet een feest. Zo most er oaltiet bie elke vergaederinge een toarte wezen. Di bie kom nog à Wim a jaeren jeugdsecretaris is.

Ons èn via via an Wim zn broere Dick Sinterklaas hevrohe een paer anekdotes deur te sturen.

Wim z'n voebalcarrière behon in 1969 toen à'tn zichzelf aanmeldde voe de voebal op het toenmaelige hemeentehuus in Wolfersdiek. Wim was (en is) oaltiet snel te 'erkenne an z'n donkere snorre. Wat at'n z'n bienaem ei ophelevert, "de Snorre." Wì at'n ok bekend mee heworre is, waere z'n ôôhe Adidas voebalschoene, tot over z'n enkels. Misschien iets mie zwakke'n enkels, want die enkels moste iedere weke worre inhetapet deur Piet de Wild. Vervolhes hieng t'em as een speer en was Wim mie z'n lucht- en lòòpvermohen de moter voe't eerste.

Wim was vroeher ok een îlle hoeie keeper. Ie ei'ter zelfs een keertje mee de Zeeuwse jeugdselecties ehîlle. Uuteindelijk kwamt'n in't twidde terecht, mae da vond Wim nie zo leuk mih. Da was te hemakkelijk voe z'n. Dirrom hing Wim mae voeballen. As voeballer deed 'nt ok nie onverdienstelijk en aelde Wim ok 't eerst'n elftal. Toen à toenmaelig eerste keeper Jacob Everwijn heblesseerd raekte bie SNS uut, most Wim keepen. SNS docht te kunnen profiter'n van `a Wim gieng keepen, mae ze kwame bedrohen uut. Wim keepte een wereldpartij en haelde d'n ene nih de oare bal uut de kruusing. Een tehenstander vroegh z'n eihen af oe hoed à d'n eigenlijke keeper wèh ewist most wezen.

Wim ei z'n mooiste doelpunt ooit hemikt op Flupland uut bie NOAD. Net as z'n zeune Jordy stond Wim bekend om zn afstandschoot'n. Ok bie NOAD schoot'n van hrôte afstand op goal. Wereldgoal, zelfs Messi zou'ter hrôôs op weze. Helaes voe Wim en voe Wolfersdiek was nota bene achterneef Rinus Z. hrensrechter bie NOAD. Die hunde zn achterneefje de wereldgoal nie. Vlagge de lucht in voe vermeend hinderlijk buut'nspel. De scheids nih de ziekant. Niemand at 't hezie, behalve neef Rinus. Doelpunt afhekeurt.

Nogh is wat. Wim most op 'n keer rieje op zitterdag mie de voebal en ie à die weke net n nieuw'n auto hekocht mie mooie lichte bekleding. Dì wilde Corné Verheezen natuurlijk wèh graeg mie mee rieje dus kroop 'em bie Wim in d'n auto. Of à Wim noe zò slecht ree of à Corné misschien een borreltje tevee op à wete me nie, má Corné spoog de lichte bekleding van Wim hlad onder. Zonde.

'T leaste jaer a Wim voebald'n was waarschijnlijk in 1995/1996. In dat jaer bleef Wim steek'n op twi assists.

Voe sommihen za't a weh bekend wezen, mae Wim gi nih dit seizoen stopp'n mie z'n diensten. Oans bin Wim îl dankbaer voe z'n jaerelange, tomelôôze inzet voe verenehinge. WIM BEDANKT!

Zie de biehevoegde foto van dat seizoen 1987-1988; Wim (mie Snorre..) en lienks op d'n achterhrond z'n broer Dick te zie bin.

Wim en Dick reynhout

 

 Wil jie je noe ok inzette voe de voebalverenihinge, neem dan contact op mie Rik Kasman of Richard Driediek.