‘Tjee, wat een weer. Motte ze noe zô voeballe?’ Terwijl de rehen mie bakk’n nî benee komt en de ouwers mè moeiluk uut de kantine te kriehen binne, trekke de mann’n van Wolfersdiek E2 hewoon richtieng klêêdkotje viere. Vandaehe de eerste bekerwestrijd as Etje, dus ’n op buitje? meer of minder mikt nie uut. Hauw omkleeë en dan in de strômende rehen nî buut’n. Spele zûh we ô, of a we noe nat worre of nie, ’t mikt niks uut. En bovendien, vandaehe mikt Leon Priem z’n debuut as scheidsrechter en die wil elemille hraag dâ de westrijd deurhit.
We starte dn eers’n elt mie strôôm mee en helieke stî de verdeduhieng van Bruse Boys onder druk, mè as echte vissers kunne die ok hoed tehen de strôôm in vaere en in de 3e menute maeke ze uut een tehenaanval 0 – 1. Helieke vanaf dn aftrap holve de Wolfersdiekaanvallen richtieng de kool van Bruse Boys, mè de kieper en verdeduhers dîvan stae dr mannetje/vrouwtje. En zôdra a ze de kans kriehe stôme ze op richtieng onze kool. Vandaehe stî Tim wee s in de kool en die ouw z’n doel keurug schône, mie steun van z’n verdeduhers Quinten, Tristan en Tycho, zoas in de 10e menute: Tristan onderschept de bal en weet helieke Quinten te vinn’n (spel’n mee omda Julian en Remco vandaehe nie over de juuste zwemdiploma’s beschikk’n), die a vervolhes in één bewehieng Yordi wigstiert over lienks. Vanaf zô wat de achterlijne weet Yordi de bal strek voe te heven, wirof Zico a klaer stît om de heliekmaeker binn’n te schiet’n: 1 – 1.
Na de Brûûse aftrap kletse we dr wee helieke bovenop en de mooie aanvalsholven bluuve over het veld rolle, mie in de 17e menute de verdiende 2 – 1: Yordi wor nae een vloeiende combinasie prima bediend en z’n uutael vanaf lienks belandt in de rechterbovenoek.!!! Even laeter is de westrijd bienae a beslist, wan Zico hî onderuut in een duel mie de kieper: Fuuuuuuuuuuuuuuuuuuuuuut! Pienantie!! ‘Dî is hin twuufel over meuheluk!’ beslist Leon. Mè helaas, Zico ei iets te vee strôôm mee en z’n schot belandt an dn Ouwelandse diek in de dulve!! En zô a je dikkels ziet nae een hemiste strafschop vaol de kool an d’andere kant: 2 – 2 in de 21e menute!. En vanaf noe weet Bruse Boys wat beter om te haen mie de waeteroverlast, wan 4 menuten laeter vaol de 2 – 3. Fuuuuuuuuuuuuuuuuuuuuuut! ‘Noe is t welletjes, ô jonges!’ En diriheer Leon ons even nî binn’n. Tied om de bakens even te verzetten. Eén voe één even in de drôher, ’n aquariusje, ’n koekje, nog wat tactische tips van Adil (‘Nooit zelf de strafschop nemen als je zelf neergelegd ben!) en ’n kieperswissel!!!!! En hup wee nî buut’n voe dn twidden elt!!!
Tsja, noe ei Bruu strôôm mee, en dî maeke ze hoed hebruuk van, wan in de 28e menute poeiere ze in één keer een uuttrap van Quinten terug in onze kool: 2 – 4! ‘Kop op manne, ouw jn ôôd boven waeter. We ebbe nog tied zat!’ We pakke de aanvalsholven van dn eersen elt wee op, mè de kieper van Bruu weet van hin wijken en a ie dat toch n paer keer doet stî de paele wee op de verkeerde plekke. En ja ô, één counter vadder en ’t is 2 – 5 in de 37e menute. Tsja, noe stî t waeter ons bienae toet an de luppen!.
Dus hooi ik r nog mè s een “Kom op jonges!’ uut: ‘Kom op jonges, we binnen noe Etjes, dus we ebbe 10 menuten langer ee!’ En …………………. dat elpt, wan Tim trapt af en speel de bal op Zico, die a helieke trug kaatst nî Tim en dan volgt dr n mooie pass op Yordi die a á la Robben de kieper omspeelt en aneens is t 3 – 5! ‘Kom op jonges, we doe dr nóg ’n schepje bovenop!’ Bruse Boys trapt af, mè de bal is helieke wee voe ons en Yordi stôômt op over lienks en weet mie een streep Zico te bereiken, mè …………………… dî stî die dekselse kieper wee. Dan mè s n keertje andersom. Messchien a dat wè lukt? En ja ô, Zico weet Yordi te vinde en die roeit dn bal snoeiard binn’n: 4 – 5 in de 38e menute.
En dan kom de 41e menute: de gouwe kieperswissel (Louis van Gaal zou wille da ie dit bedocht a) betael z’n eihen uut: Quinten pakt de bal klemvast nae een strak schot van Bruu en weet mie z’n uuttrap Yordi te bereiken op lienks, die a vervolhes, mie een strakke bal Tim anspeelt; ‘t stifje wat of dan volgt lit zelfs de rehen even stoppe mie plenzen!!!!: 5 – 5. Van dit doelpunt zou zelfs Bergkamp stille vaolle!!! Nae a Tim vanonder z’n medespelers evist is, is t voe Bruu dweile mie de kraene open, wan helieke nae de aftrap is de bal wee voe ons en is Yordi z’n schot zô ard da de bal via t bêên van een Bruuverdeduher in de kool verdwijnt: 6 – 5 (nog steeds de 41e menute!). Tsja, tehen zô vee druk vaol nie te hozen, wan wee onderscheppe we de aftrap en poeiert Yordi de bal op de paele. Mie moeite wete de Bruuverdeduhers de bal wig te roeien, mè uut de dî opvolhende inhooi van Tycho op Senna kom de bal bie Yordi en is t aneens 7 – 5 (42e men.).
Zô, de westrijd is hespeeld? O, nee, wan Bruu kom nog sterk opzette en is t bie ons nog vuuf menuten aolle hens an dek, mè helukkug wete we stand te ouwen, ok a scoor Bruu nog de 7 – 6 (46e men.).
En dan, in de 52e menute (Leon z’n horloge bleek nie waeterdicht) blaes de scheids af. Drie bekerpunten rieker en kilo’s zwaerder kunne we behunne an de pienanties!
‘Hee, ’t is drôhe!’
