zitterdag 12 september ’15: Wolfersdiek E1 – Duuveland E1 5 - 3

WE1 DuuvE1a

 Nae twî bekerwestrijen spele we vandaehe onze eerste competisiewestrijd en dat belooft â helieke een spannende pot te worr’n, wan Duuveland E1 is een pittuhe tehenstander en bovendien motte we ’t ok nog doe zonder Remco. ’t Behun is wat zenuwachtug, wan we motte eerst nog om 8.45 ure op de foto, mè de hoffotohraaf is om dez’n tied in hin veld’n of wehen te bekenn’n. Bliekbaer ei ie wiekend en mag dus uutslaepe. Mè net â we ons op wille maeke voe de aftrap vliehe de stofwolk’n over ’t veld:

WE1 DuuvE1b

en kom de fotohraaf aneflitst! Even is d’r verwarrieng, wan in de polder wor d’r ok de zwarte cross van Wolfersdiek verreeë en roept Tycho: ‘Ze hae behunne!’ Mè ’t is toch Erik, dus aollemille hauw even nî ’t veuheltje kieke, lache en aftrappe! O, nêê, we spele tuus, dus de aftrap is voe Duuveland en helieke stae we een bitje onder druk. Mè helukkug ei Julian ’t stof uut z’n ôhen evreve, dus elke bal is voe um. Nae 3 menut’n weet Yordi de bal van de tehenstander te ontfrutselen, zet de turbo d’r op en hî op de kool van Duuveland af. Z’n schot wor eblokt en de dî op volhende corner wor nae een inzet van Femke van de lijne ehaele. In de 7e menute zet Yordi nohes z’n turbo an en noe is z’n schot wè rââk: 1 – 0. Lang kunne we nie heniete van deze voorsprong, wan twî menuten laeter bluuf de bal ’n bitje lihhe en jast Duuveland de heliekemaeker tehen de touw’n: 1 – 1. ’t Spel bluuf op en neer holve, wan in de 11e menute zet Yordi wee mè ’s an voe een actie over lienks en hî een 1 – 2 an mie Siebe, mè op de achterlijne wor ie pootje aekt! Scheids Richard ouw wè van manluk voebal, dus z’n fluitje bluuf angstvallug stille. Of pass’n ie bie voorbaat â de voordêêlrehel toe? Tristan onderschept de bal en dribbelt z’n eihen behendug langs een paer tehenstanders en zet Yordi mie een steekballetje allêên voe de kieper. Die is kanslôôs op de varre schuuver. Zô is ’t dan toch nog 2 – 1 in de 14e menute. De aftrap van Duuveland wor wee helieke onderschept en we kriehe de ene kans nae d’n andere’n: schoten van Siebe, Tristan, Juul en Yordi worre steeds wee tehen ehouwe deur de kieper. Tussendeur steke ze van Duuveland af en toe akelug hevaerluk over, mè Nienke heef hun krump: iedere bal is voe eur. In de 24e menute weet ze wee een bal af te pakken en helieke op Femke te pâsen, die vervolhes langs de lijn d’r vandeur snelt. Jammer henoeg kan de scheids ’t tempo nie bie ouwe en fluit hauw af net op ’t moment a Femke uut wil aele!!!! ‘k Mô even biekomme ô!. Dus druupe we mè bedurpeld van ’t veld af. Tied voe ’n bakkie!!!
Vee rust pakke we nie, wan we wille hauw wee vadder om d’r nog een paer kooltjes bie te prikk’n. Jammer henoeg hieng de scheids in de kantine wat drienke, dus mô die van wat vadder komme. Mè dan om 9.36 ure is ’t eindeluk wee zô varre en klienkt ’t fluitje voe d’n twidd’n elt. De hretugheid spat d’r vanaf wan in een mum van tied binne we bie de kool van Duuveland. As in een flipperkasse vlieg de bal een en weer en uuteindeluk over de achterlijn: corner! Even ’t balletje hoed lehhe en dan krul Yordi de bal, welliswaer nog via een Duuvelans bêên keurug in de kool: 3 – 1 (27e menute). Mè de westrijd is nog nie edae, wan Duuveland behun ok wee druk te zett’n op onze kool en meuhe ok een corner neme. De bal draait vervaerluk in, mè helukkug weet Tim (ei in de rust ewisseld mie Juul) de bal nog net op de lijne te pakk’n en in één bewehieng trapt ie de bal varre uut nî Femke die a helieke Juul  anspeelt. Tjee, wat ’n schot vertrekt d’r van z’n voet en as een streep hî die in de bovenoek: 4 – 1 (30e menute). En een menute laeter lig bienae de 5 – 1 d’r in, mè het schot van Yordi in de bovenoek wor keurug epakt deur de kieper. En volgt ‘r een counter en prikke ze de 4 – 2 d’r in!!! En dat in de 33e menute! Nog 17 spannende menuten te haen. ’t Spel bluuf op en neer hae, mie eel vee mooie aanvallen en kansen voe ons en â d’r â ‘s een balletje deurene komt is die of voe Nienke of voe Tim. Toet de 40e menute  wan dan mag Duuveland een corner neme. Uut de corner ontstae d’r hectische taferêlen, wan de bal bluuf mè tussen eel vee voeten een en weer hae. Onze supporters schreeuwen: ‘Wig mie die bal!!!!’, mè een drôhe knal zet toch de 4 – 3 op ’t bord. M’n arte sprieng zô wat uut m’n kele en ’t zwêêt stî in m’n and’n!!! Wat ’n spannieng. Mè wee hauw aftrappe en an d’ andere kant probere te scoren, mè jammer henoeg lukt dat nie mî zô. Ball’n op de paele, tehen de latte, de kieper of net neff’n en steeds tussendeur hevaerlukke uutvallen van Duuveland. Helukkug is Nienke echt ’t slot op de deure, wan d’r kom hin tehenstander mî langs en in de 45e menute pââs ze ok nog de bal keurug nî Yordi, die a in één bewehieng Siebe anspeelt, mè net voeda die binn’n wil tikke tikt ’n Duuvelander de bal wig en behunt an een oversteek. De uutval wor aferond mie een poeier ………………………… op de paele. Pfffffffffffffffffffff, was dat even billekniepe! De bal stuitert wee trug voe de voet’n van Nienke, die â helieke nî voren dribbelt en op ’t juuste moment Yordi anspeelt: de kool vaolt noe helukkug an d’overkant: 5 - 3 in de 46e menute!!! Dan volhe nog 4 lange menuten voedâ de scheids d’r wee deurene zit en affluit voe ’t einde! ’t Einde van een schitterende westrijd, boeiend van de eerste toet de leste menute. ‘Yessssssssss!’, roept Tycho, ‘noe nî de cross!’