Zitterdag 5 september ’15: Wolfersdiek E1 – Hoes E2G 10 - 0

WdijkE1GoesE205092015

Vandaehe spele we de twidde bekerwestrijd van het níeuwe seizoen en de tehenstander is Hoes E2G. Benieuwd of we vandaehe wee een mooie westrijd op de matte kunne lehhe. An de warmieng up zâ ‘t nie lihhe, wan aolle spelers lôpe d’r eihen noe â in ‘t zwêêt! En ruum voe aanvang binne we d’r â klaer voe. Mè scheidsrechter Leon is een fluiter volhes de rehels: in ‘t bekertoernooi diene de westrijen stipt op tied te behunn’n, dus wor dr nie afetrapt voe nehen uren! Dát binne noe eenmaal de reheles van de KNVB. Dus klienkt d’r klokslag nehene ‘fuuuuuuut’ en mag Hoes behunne an de westrijd. Ze proberen helieke een aanval op te zett’n, mè wij weten metêên de bal te veroveren en in de tehenaanval te haen. Een eerste actie van Siebe eindugt in d’ and’n van de kieper en ok een solo van Julian is een prooi voe diezelfde kieper. En helaas, een schot van Remco, nae een indrukwekkende solo belandt net neffen de kool. En dat aolles in de eerste vier menuten. En dan breekt menute vuuve an: Yordi hî d’r op de lienkerkant vandeur en z’n perfecte voorzet wor deur Juul mie een drôhe knal aferond: 1 – 0. Nie vee laeter weet Nienke de bal af te pakken van een Hoesaanvaller en ze speel helieke Femke an; in één bewehieng heef die de bal an Remco en zien pass wor deur Yordi keihard op de paele emikt!  En zô bluuve de aanvallen mè komm’n en mô de defensie van Hoes aolle zeilen biezette om ons van scoren af te ouwen. Zôdoende worre inzetten van Tycho, Siebe en Juul nie mie een doelpunt belôônd, todâ de 12e menute anbreekt. Hoes zet eerst een aanval op, mè Tycho weet de bal te veroveren en speel knap Yordi vrie. Zien crosspaas bereikt Remco die â knap de kieper uutkapt, ‘m omspeelt en binn’n schuuft: 2 – 0. Achter ’t doel zie ‘k scout Jos driftug in z’n boekje schrieve! De aftrap van Hoes wor metêên wee ’afekapt’ deur Femke, mè eur voorzet is nét iets te ‘scherp’ voe Siebe (of z’n voebalschoen’n binne te kleine), anders was ’t scorebord wee â verspronge. De kieper kan dîdeur rustug de bal opraepe en uuttrappe, keurug nî de ziekant, mè ………………………. ie a nie op Juul erekend: een onderscheppieng, hevolgt deur een voorzet en een poeier van Yordi betekent 3 – 0 (17e menute). En dat a zô vroeg in de westrijd. De ‘spionkop’ behun zachjes ’10, 10, 10’ te roep’n, mè bliekbaer ebbe ze ’t toch ehore, wan d’r volgt een aanval over vele schieve’n die â messchien iets te varre nî de ziekant wor deurevoert! ’t Leste balletje brêêd van Siebe belandt bie toch net nog bie Yordi en vanaf de zielijne vertrekt d’r een bal, over de kieper in de uuterste kruusieng van ’t doel: 4 – 0 (19e menute). Hoes mag wee ’s aftrappe, mè ze kriehe nie vee kans om een anval op te zett’n, wan wee zitte we d’r helieke bovenop. Doelpoohiengen van Siebe en Tycho worre van de lijn ehaele of de bal vlieg net neffen de kool. In de 23e menute breekt Hoes aneens uut en weet Yordi pas op t aollerleste moment de bal wee trug te veroveren. Even opdribbelen en dan een balletje op maete voe Femke, die â de bal netjes anneemt en vervolhes op volle snelheid richtieng doel hit. Mie een knappe schuiver schiet ze de 5 – 0 binn’n. Flak nae de aftrap van Hoes ebbe we wee de bal terug in bezit en volgt d’r een nieuwe aanval, mè de acties van Juul, Remco en Tycho levere dit keer ’s hin kool op.
‘Zo! En noe is ’t welletjes! Fuuuuuuuuuuuuuuuuut! Tied om te rusten!’ En zô sjokke we achter Leon an elemille richtieng kotje 2. Scout Jos ei henoeg ezie en staemelt: “Jô, ik heb kramp in m’n vingers van ’t schrijven. Leuk ploegje hôôr! ‘k Zal Danny hierover inseinen!”
Hehêêl volhes de scheidsrechterscao 15 menut’n pauze, mè jâ de ’10, 10, 10’ zit nog in d’ oren, dus binne ze nie te ouwen en zôdra â de bekertjes leeg binne renne ze wee trug nî ’t veld. De mouwtjes worre nohes opestropt en ‘kom mè op!’ Alleen, nog hin scheids, dus nog even wachte. Klokslag 10 over alluf tiene meuhe wij ‘s ’n keertje aftrappe en ok â spele we noe van de ‘spionkop’ af, toch wee mè helieke vol in de aanval. In de 27e menute zurgt Yordi mie een hekraekt schot voe de 6 – 0 en drie menuten laeter mikt ie vanuut een corner van Remco tehendraeds de 7 – 0. Dan breekt ‘r een periode van 10 menuten an, wî in de bal d’r mè nie (mî??) in wil!! Zô wordt ’r een schot van Femke van de lijne ehaele, is Tycho z’n bêên net te kort en strande een paer mooie solo’s van Tristan of in de anden van de keiper of op ‘z’n vuusten. Mè dan, in de 40e menute zet Remco nog mè ‘s ’n keer an voe een slaelom over de as van ’t veld. Z’n schot wor nog wigewerkt, mè Yordi is d’r  as de kipp’n bie om de 8 – 0 binn’n te schiet’n!!  En 2 menuten laeter onderschept Tristan nog mè ‘s ’n bal en zet wee an voe een solo, mè nét op ’t leste moment wor ie hestuit. Helukkug is de ansluutieng hoed en tikt Yordi de 9 – 0 binn’n. Het tuuspubliek achter me behun z’n eihen noe flienk te roeren, wan de dubbele cijfers zitte d’r nog in, messchien. Nae een uuttrap van kieper Juul (â in de rust ewisseld mie Tristan) probeer Tycho ’t mie een ‘Willy Carbootje”, mè die bal wor onderschept deur Hoes. Deze tehenaanval is mè van korte duur, wan Nienke weet de bal te blokk’n, de tehenstander uut te spelen en Tristan an te spelen. Even opdribbele, Yordi anspele en vervolhes ’t steekballetje op Tycho. Mie z’n lienker tikt ie de 10 – 0 achter de kieper (45e menute).
De leste vuuf menut’n levere, ondanks nog een andje vol mooie aanvallen, hin doelpunten mî op! D’r worre hin extra menut’n mî bie etrokke, dus presies op tied wor d’r afeflote! En dî mee kom d’r ’n einde an een prachtuhe westrijd; 50 menut’n lang ebbe de talrieke toeschouwers kunne heniete van twî enthousiaste teams!!!
Nog één westrijdje te haen en we kunne deur nî de knock-out-fase?????